Monday, 13 June 2016

كل شي عن السفر الى اسطنبول | All about visiting Istanbul



السلام عليكم ورحمة الله وبركاته
كيفكم حبايبي
زي ماتعرفون اني قبل كم يوم كنت باسطنبول وكثير اسئلتكم عن اسطنبول فقررت اسوي هذا البوست بحيث يكون مرجع لك كدليل للتسوق والمواصلات والمطاعم ومعلومات عامة عن اسطنبول
اول شي اذا جيتي تسافرين راح تختارين مكان السكن وطريقة المواصلات فلازم تعرفين انه اسطنبول من اكبر مدن العالم والزحمة فيها لاتوصف، مدينة تقع على اسيا واوروبا وبين القارتين جسر فدقة اختيار مكان السكن وطريقة المواصلات مرة مهمة



:السكن
اغلب السياح من كل مكان بالعالم اذا جو اسطنبول يتمركزون بمنطقة تقسيم بالطرف الاوروبي وهيا وسط اسطنبول صحيح بس انا ما احبها لاني اشوفها منطقة غير راقية ومشاكلها كثير اضيفي انو اسعار الفنادق فيها اغلى من اسعار الفنادق بمناطق ثانية بس لشهرة المنطقة يعني راح تلقين فنادق مواقعها احلى وسعر اقل ومستوى فندقي اعلى، ماعمري قابلت شخص تركي او من الي يفهمون اسطنبول كويس الا ويأيدني الرأي بالموضوع هذا
منطقة تقسيم
اقترح عليكم تسكنون بفندق على شارع بشكتاش بالقسم الاوروبي قدام البسفور وقريبة من الجسر الي يوصلك بالطرف الاسيوي وقريبة من اورتاكوي مكان ماتركبون عبارة تمشيكم بالبسفور وتاكلون بطاطس ووافل وفيه محلات وكشكات اكسسوارات وخرابيط وكمان ميناء بشكتاش الي تاخذون منه سفينة توديكم جزر الاميرات او تاخذون اوبر بوت ينقلكم مكان ماتبغون بالبحر
منطقة اورتاكوي Ortakoy 
مسجد اورتاكوي 
 قصر دولمه بهجة Dolma bahce saray

كمان عندك هذي الاربعة ارقى مناطق اسطنبول ممكن تسكنين فيها وقريبة من مطاعم واسواق مهمة كثير واغلب المشاهير هناك موجودين
Bebek, Sariyer, Etiler و Ulus
احنا كنا ساكنين بمنطقة اولوس من الفندق ننزل مشي على اورتاكوي وفي كافيهات ومطاعم كثير قريبة مشي راح اكتبلكم اسمها تحت، الفندق عبارة عن قصر قديم وفيه حديقة فنانه تقطفين منها الفواكه وتاكلين، وفيه مطعم ستيك مرة لذيذ لازم تجربونه اذا كنتوا ساكنين بالفندق
Symbola bysphorus اسم الفندق

منطقة فاتح قريبة من قصر توب كابي ومسجد ايا صوفيا ومسجد السلطان احمد وقراند بازار والسوق المصري وحديقة قولهانى، انا ماحب اسكن فيها لأني احب انزل اتمشى او اتقهوى بالليل لما ارجع الفندق وهذي المنطقة تقفل بدري بس هيا قريبة من معالم سياحية مهمة وكثير يحبون يسكنون فيها
Gulhane park حديقة قولهانى


Somewhere from Grand bazaar to spice market

في شارع عثمان بيه ونيشان تشي قريبين من تقسيم وارقى من تقسيم بس برضو ماحب اسكن فيهم لأن الشي الوحيد المهم هناك هو التسوق و تقفل مرة بدري بعض الماركات من الساعه 8 المساء
Nişantaşı نيشان تشي 
طبعا انا حطيتلكم الاماكن الممتازة للسكن وانتي اختاري حسب اولوياتك مثلا اذا يهمك المعالم الدينية والتاريخية بتسكنون بفاتح واذا التسوق اهم شي عندك نيشان تشي او عثمان بيه واذا السهر والقهاوي تقسيم واذا تحبون الكافيهات الراقية والبحر والمولات والمشي زيي عندك بشكتاش والاحياء الاربعة الي كتبت اسمهم فوق

:نجي عند المواصلات
باسطنبول فيه مترو وترام بس انا ماجربت الا المترو ومرة وحدة فما اقدر انصحكم او انفركم منه 
التكاسي ما انصح فيها لكثرة النصب ولسوء اخلاقيات كثير من سواقين التكاسي 
افضل خيار وممتاز هو تطبيق اوبر مافي تلاعب بالعداد ابدا ويجيكي بالمكان الي انتي فيه بالضبط وتقدرين تختارين نوع السيارة حسب عدد الاشخاص واذا كنتي قريبة من البحر يطلعلك خيار اوبر بوت يعني تاخذين بوت ويوصلك مكان ماتبغين برضو لو لاسمح الله ضيعتي شي بالسيارة تقدرين تتواصلين لرقم سواقك عن طريق التطبيق او التواصل مع شركة اوبر
كمان ممكن تاخذون سواق خاص معاكم طول اليوم وصراحة مرة مريح هذا الخيار خصوصا اذا انتي من النوع الي تتسوقين تحطين اكياسك بالسيارة وترتاحين من شيل الاكياس لكن اذا بتاخذين سواق خاص اتفقوا من البداية على السعر باليوم وهل راح تتحملين البنزين والمواقف واكل السواق خلال اليوم او لا! لأنه بعض السواقين كل ماتمشين خطوتين يقولك ادفعي بنزين ادفعي مواقف ولو وداكي برا اسطنبول راح يدفعك السكن حقه فاتفقوا على هذي الامور من بدري
  
:بالنسبة للتسوق حسب انتي ايش تبغين
اذا تبغين الماركات الهاي اند الاوروبية زي شانيل قوتشي برادا .. الخ عندك استينيا بارك و زورلو ونيشان تشي
Istinye park استينيا بارك 
zurlu زورلو مول
اذا تبغين فساتين سهرة وفساتين عرايس شارع نيشان تشي وشارع فاتح، فاتح الشارع  طبعا محلات على يمينك ويسارك في جنب احلى من الثاني فانصحكم تفرون الشارع مضبووووط واذا كنتي عروسة اكيد راح تلقين فستان لزواجك
فيه شارع بكر كوي كمان للفساتين بس ما رحتله فما اعرف اذا حلو او لا
اذا تبغين ملابس وفساتين ناعمة ويومية تصاميم تركية راقية غير عن الي عندنا باسواق الخليج او باوروبا زورلو واستينيا بارك وشارع نيشان تشي كلهم بالقسم الاوروبي وشارع بغداد بالقسم الاسيوي شارع مرة كبير ومليان اشياء وقطعة السكة فيه صعبة شوية
بالنسبة لمحلات الجملة يبيعون لك اقل شي مثلا 4 قطع تلقين بشارع فاتح وشارع عثمان بيه 
الملخص انه شارع نيشان تشي فيه كل شي واحلى شارع للتسوق صراحتا
من المولات الي حلوة بشكل عام فيا لاند فيه ملاهي يمدحونها وهو بالقسم  الاوروبي
Vialand 
 اكوا فلوريا فيه مطاعم وكافيهات وحديقة على البحر اجواءه روعة بالقسم الاوروبي وقريب من مطار اتاتورك مرة
Aqua florya كافي مادو الي في اكوا فلوريا

وبالقسم الاسيوي قريب من مطار صبيحة عندكم اوتلت فيا بورت فيه بحيرة ومطاعم على البحيرة مرة ممتع
Via port فيا بورت
:بالنسبة للمطاعم
احب بالسفر اني اجرب المطاعم الي اهل البلد نفسهم يروحونلها واحب اجرب الاكل المحلي
بالنسبة لتركيا الاكل المحلي ماعمري دخلت مطعم وقلت اكله شين صراحة المشاوي والكوفتة دائما لذيذين يعني محبين اللحوم بيلقون جنتهم بأسطنبول،، اتذكر مرة قلنا لسواق التاكسي نبغا مطعم يكون مرة لذيذ على طريقنا قال يعني عادي عندكم مطعم محلي بسيط قلنا ايوا ايوا عادي يوم وصلنا طلع المطعم من برا كأنه كافتيريا وسط حي وشوية خفنا وتدلعنا المهم تعوذنا بلله من الشيطان ودخلنا والله العظيم كان الذ مشاوي اكلتها مو بس بتركيا الا بكل حياتي وندمانه مرة اني ماعرف لا اسم المطعم ولا المكان،، الزبدة لاتشيلون هم المطاعم وتدورون على مكان معروف ومشهور ادخلوا اي شي وتجرؤوا وجربوا وبتستمتعون
بشكل عام الطلبات الي احب اطلبها بأي مطعم محلي كوفته بالجبنة وكوفته عادية وكباب بالفستق يمممممي
بالنسبة للمطاعم المشهورة الي اجوائها حلوة ووسيعة صدر عندك
Huqqa, Ulus, oba, The market, lokma, Nusret
في كمان مطعم قونايدن فيه نوعين قونايدن بالسوق طرف الفود كورت مرة رخيص وفيه قونايدن مطعم متكامل اغلى من العادي طبعا بس كلهم لذيذييييين، لهم فروع مرة كثير ابحثوا عنها
كوفته بالجبنة ياويل قلبي
بالنسبة للقهوة والحلى عندك عشق كافيه على البسفور اجوائه من جد عشق ويمديكي تتقهوين بالكمبنسكي او فورسيزون اجوائهم حلوة وعلى البسفور كمان
Ciragan palace Kempinsky
وكافي مادو موجود بكل زاوية باسطنبول وينفع فطور
Mado
كمان في قهوة حافظ مصطفى بتقسيم تفتح 24 ساعه ولها فروع ثانية عندهم كنافة بالجبنة ومهلبية بالتين وقهوة مستكة مميزة واكثر اطباقهم ممتازة
Hafiz mustafa
باختيار المطاعم انصحكم بتطبيق فورسكوير يوريكي المطاعم الي قريبة منك وتوصيات الناس والتقييم،التطبيق مرة مرة مفيد ومهم
حاولوا ماتاخذون فكرة عن الاماكن من الصور قدر الامكان لأنو الصور متواضعة وانا حطيتها بس عشان مايكون البوست ممل
واذا تبغون اكثر واكثر شيكوا على هاشتاقي بالانستقرام
#SolisarInIstanbul
وكمان هاشتاق نورة اختي في تركيا لايفوتكم
#NorahInTurkiye

5 comments:

  1. يعطيك العافيه معلومات مفيده ورائعه عشت معكم الاجواء مرره ربي يوفقكم
    Amal��

    ReplyDelete
  2. مرة جمييل حبيبتي كفيتي و وفيتي كنت متابعة ادق التفاصيل ع السناب

    ReplyDelete
  3. يعطيك العافية سارونه حمستيني 😍😍😍👌

    ReplyDelete
  4. يعطيك العافيه معلومات شافيه ووافيه

    ReplyDelete
  5. شركة متخصصة فى الخدمات المنزلية بالمملكة العربية السعودية
    تقدم لكم شركة سما المثالية خدمات داخل المملكة العربية السعودية بالرياض والدمام والاحساء والقصيم والقطيف والخبر والجبيل ورأس تنورة.
    تستخدم الشركة أحدث الأجهزة والتقنيات فى تقديم خدماتها لكشف تسربات المياه وعزل الأسطح والعزل المائى والحرارى ورش المبيدات ومكافحة الحشرات.
    لدينا فرق عمل مدربه وخبراء متخصصين.

    خدمات القطيف

    شركة كشف تسربات المياه بالقطيف


    شركة عزل اسطح بالقطيف



    شركة مكافحة حشرات بالقطيف


    شركة تسليك مجارى بالقطيف






    شركة كشف تسربات المياه بالقطيف



    ReplyDelete

Share this post

Solisar's Instagram